Keisaraskurður

laugardagur 19. mars 2022

Lífið er ekki eilífur dans á rósum.  Það fengum við að reyna í dag.  Krúna, ein kýrin okkar átti tal 28. mars, en síðustu tvo daga benti ýmislegt til þess að ekki væri allt með felldu hjá henni.

Seint í gærkvöldi fannst okkur sem hún væri að fá "sóttina".  Ekkert gerðist þó, og eftir hádegið í dag "fórum við með henni" til þess að kanna stöðuna.  Þá kom í ljós að fóstrið var dautt og lá þannig að ógerningur reyndist að ná tökum á því.

Þá kölluðum við til Katrínu Harðardóttur dýralækni.  Niðurstaða hennar skoðunar var sú að keisaraskurður væri það eina sem gæti bjargað Krúnu.

Var strax hafist handa við undirbúning "aðgerðarinnar".  Fljótlega kom í ljós að kálfarnir voru tveir og báðir dauðir.

Nú vonum við bara að Krúna jafni sig á þessu og nái heilsu á ný.

Þetta var í fyrsta skipti í tæplega 17 ára búskaparsögu okkar sem framkvæmdur er keisaraskurður.